Зам, тээвэр, барилга, хот байгуулалтын яамны Сургалт, судалгаа, хөрөнгө оруулалт, барилга захиалагчийн алба БНСУ-ын Ханьяаны Их сургууль хоёр улсын зам, барилга, хот байгуулалтын салбарын инженер техникийн ажилтны чадавхийг дээшлүүлэх, мэргэшүүлэх, шинээр нэвтэрч буй техник технологитой танилцуулах, туршлага солилцох зорилгоор хамтран ажиллахаар болжээ. Энэ ажлын хүрээнд 22-24-нд тус сургуулийн Барилгын инженерийн сургуулийн захирал Shing Sung Woo, Олон улсын хамтын ажиллагааны газрын дарга Lee ki Jeong нар манай оронд айлчилж байгаа аж. Тэд Сургалт, судалгаа, хөрөнгө оруулалт, барилга захиалагчийн албатай хамтран барилга, авто зам, төмөр замын салбарын инженерүүдийг Солонгост суралцуулах хугацааг тохирох, сургалтын хөтөлбөрийг боловсруулах зорилготой иржээ.
Монголын барилгын салбарын хөгжлийн түвшин, техник технологитой танилцаж мэдээлэл авах зорилгоор өчигдөр ЗТБХБ-ын сайд Х.Баттулгатай уулзаж, салбарын хэмжээнд хэрэгжиж буй төсөл хөтөлбөртэй танилцсан байна.