Эрчим хүчний шинэ эх үүсвэрээ шийдэхгүй бол шинээр орон сууц барих боломжгүй бөгөөд ирэх жилээс эрчим хүчний хомсдолд орно гэдгийг мэргэжилтнүүд сануулсаар байгаа.
Тиймдээ ч V цахилгаан станцыг ойрын хугацаанд барих тухай ярьж байсан ч тодорхойгүй шалтгаанаар тендер нь зарлагдахгүй хоёр жил өнгөрлөө. Баянзүрх дүүргийн Улиастайн зүүн аманд барих гэж нэлээд маргаан дагуулж байсан уг станцыг Багануурт барих тухай ярьж байна.
Гаднын улс орнуудад цахилгаан станцаа хотоосоо гадагш, мөн нүүрсний уурхайдаа түшиглэж барьдаг жишиг бий. Үүний дагуу Багануурын нүүрсний уурхайг түшиглэн V дахь эх үүсвэрээ барихаар шийдэж буй бололтой. Ингэснээр Улаанбаатарын утаанд “хувь нэмэр” оруулахгүй, тээврийн зардал хэмнэх ач тустай шийдвэр болох аж. V станцын хүчин чадал 300 МВт байх бөгөөд Улаанбаатар хотын зүүн дүүргийг дулаанаар, харин төвийн бүх сүлжээнд цахилгаан нийлүүлэх юм.