Төрийн ордны арын цэцэрлэгт хүрээлэнд эрх баригчид "Парламентын дүүжин ордон"-г удахгүй сүндэрлүүлэх бололтой. Зураг төсөл нь бараг л бэлэн болсон гэнэ. Хуучин Төрийн ордноо ад үзэж, шинэхэн ордонд тухлах гэж яарсан манай зарим түшээдийн санааг Кувейтийн сан дэмжиж хөрөнгө, мөнгийг нь гаргахаар болсон. Үүндээ сэтгэл нь хөөрсөн түшээд нийслэлдээ ганц үлдээд байгаа цэцэрлэгт хүрээлэндээ барихаар шийдвэрлээд байна. Гэнэт л нэг өдөр хөгшид, залуусын ганц очдог газрыг хэрмээр хэрж, хязгаар тогтоогоод байсны учир нь энэ байж. Хуучин муу саарал ордон руугаа дөхүүлэхгүй гэсэндээ төмөр тор татсан тэд, будаг нь ханхалсан ордноо бүр ч илүү хамгаалах биз. Ингэхээр ганц үлдсэн цэцэрлэгт хүрээлэн иргэдийн хувьд түүх болон үлдэнэ. Ногоон байгууламжийг нь сүйтгэхгүй "дүүжин" Парламентын ордон барьсан ч иргэд тэр доогуур нь явж болох юм гэж үү.
Хаана л бол хаана газар авчихдаг эрх мэдэлтнүүдэд ордны арын цэцэрлэгээс өөр газар олдохгүй байна гэж үү. Уг нь хаа сайгүй газар олдож буй ч тэд хүчлэхгүй байгаад гол учир нь бий. Юутай ч хэдэн жил хотыг чимсэн ногоон байгууламж эрх мэдэлтнүүдийн тухлах ордны хөлд дарагдах бололтой.
Шинэхэн Төрийн ордны талаар УИХ-ын Тамгын газрын дарга Ц.Шаравдоржоос тодруулсан юм.
-Шинэхэн Төрийн ордон удахгүй сүндэрлэх бололтой. Таны энэ ханан дээрх зургийг харахад, хойд талын цэцэрлэгт хүрээлэнгийн газар дээр барихаар зураг төсөлд нь тусгагдсан байх юм?
-Төрийн ордны өргөтгөл барих асуудал анхаарал татсан чухал сэдэв болоод байна. Парламентын ордныг Төрийн ордны хойд цэцэрлэгт барихаар шийдвэрлээд байгаа. Гэхдээ ногоон байгууламжийг нь устгах гээд байгаа юм байхгүй. Хүмүүс төрийн ордны саадыг байхгүй болгож, оронд нь хэцүүхэн барилга барих нь гээд байгаатай санал нийлмээргүй байна. Харин ч ногоон байгууламжийг нь 100 хувь үлдээнэ. Парламентын ордон барих зураг төслийнхөө хамт мод тарих, усан оргилуур байгуулах тохижилтын асуудлыг давхар шийдвэрлээд явж байгаа. Байгаль орчин сүйтгэсэн үйлдэл байхгүй гэдгийг нэн тэргүүнд онцлон хэлье.
-Заавал парламентын ордон барих шаардлагатай байгаа юм уу. Одоогийн энэ ордон юу нь болохгүй байгаа юм бэ?
-Одоогоор Төрийн ордны ачаалал ямархуу байгааг та бүхэн мэдэж байгаа. Миний хувьд хурдхан шиг л барилгаа дуусгаад парламентын ордондоо орохыг бодож явна. Наанадаж энэ гишүүдийн өрөөг жигд болгомоор байна. Сэтгүүлчдийн өрөө ч одоогийнхоосоо 4-5 дахин том болно гээд бод л доо. Ингэснээр сэтгүүлчдийн ажиллах нөхцөл ч сайжирна. Гарч, ороход чинь ойрхон байг гээд нэгдүгээр давхарт сэтгүүлчдэд зориулсан өрөөг барихаар төлөвлөсөн.
-Кувейтийн сангаас хэчнээн ам.доллар өгөхөөр болсон юм бэ?
-Мэдэхгүй. Мөнгөнийх нь тоог санахгүй байна аа. Өөрсдөө мөнгөгүй байж хүн мөнгө өгье гэж байхад амандаа орсон шар тосыг хурдхан үмхээд авахаас өөр аргагүй. Шинэхэн Парламентын ордонтой болоход ямар нэгэн улс төрийн болон бусад саад тотгор битгий тохиолдоосой.
-Төрийн ордон барихад Кувейтийн сангийн өгсөн мөнгөн дээр нэмж 4.5 тэрбум төгрөг шаардлагатай гэж байсан. Үүнийг нөгөө тал хэрхэн хүлээж авсан бэ?
-Энэ тал дээр санаа зовох хэрэггүй гэсэн. Ер нь мөнгөний асуудал дээр санаа амар байж болно.
-Өөр газар, тэр дундаа хотын захад барьж болдоггүй юм уу?
-Болно л доо. Болохгүй юм гэж юу байх вэ. Яармагт ч барьж болохгүй гэх газаргүй. Гэхдээ Төрийн ордон Яармагт байна гээд бод доо. Наанадаж сэтгүүлчид та нар ч очиход төвөгтэй биз дээ. Тэгээд гэр хорооллын утаа униар дунд Төрийн ордон байх нь хир зохимжтой байх бол. Ингээд бодохоор Төрийн ордон энд л байх учиртай. Ер нь хотын захад барина энэ тэр гэж Парламентын ордонгоо ад үзэх хэрэг байна уу. Шуудхан хэлэхэд Зайсан, Яармагт барих боломжгүй.
-Харин ч боломжтой юм биш үү. Дэлхийн бусад орны жишгээр Парламентын болон Засгийн газрын ордон хоёр нь өөр өөр газар байдаг шүү дээ?
-Дэлхийн жишгээр ярих юм бол Ерөнхийлөгчийн Засгийн газар нэг байранд байдаггүй нь үнэн. Харин манайх хамт байдаг. Гэхдээ л Парламентын ордон энд баригдах учиртай. Учир нь төв талбайн хажууд Парламентын ордон байх ёстой. Хаана ч барих газар нутаг манайд бий. Хөшигтийн хөндийд барьсан ч болж л байна. Гэхдээ төр гэж байдаг бол аятайхан Парламентын ордон байх учиртай. Тэр нь ч хотынхоо төвд байх ёстой. Үүний цаана давхар нэр хүндийн асуудал явж байна шүү дээ.
-Тэгвэл энэ хажуухан талд Хэвлэх үйлдвэрийн барилга балгас болчихсон байна шүү дээ. Үүнийг нураагаад барьж болно биз дээ?
-Үүнийг ёстой мэдэхгүй.
-Кувейтийн сангаас нэлээд дээхэн мөнгө өгөхөөр шийдвэрлэсэн. Гэтэл өдгөөг хүртэл Парламентын ордны шав нь тавигдсангүй. Үүнийг Кувейтын тал хэрхэн хүлээж авч байгаа вэ?
-Мөнгө өгөөд байхад баригдахгүй удаж байгаад гайхаж л байгаа байх. Миний хувьд ингэж л бодож байна.
-10 компанийг тендерээр шалгаруулна гэж байсан бил үү?
-Тийм. Тэгээд шалгарсан нь Кувейтийн нэг компанитай хамтарч гүйцэтгэхээр тохиролцсон. 10 компанийнхаа нэрийг Кувейтийн тал руу явуулсан байгаа.
-Барилгын ажил хэзээ эхлэх юм бэ?
-Намраас эхлэх ёстой. Ажлын зураг, төсөл нь бараг л дууслаа.
-Кувейтийн тал дагалдуулж ямар төсөл хэрэгжүүлэх юм бэ?
-Манай талаас Төв номын сан, эмнэлэг хоёр байгуулж өгөх санал тавьсан. Кувейтийн тал эхлээд Төрийн ордноо босгочих, дараа нь энэ асуудлыг шийдвэрлэе. Болохгүй юм байхгүй гэсэн хариу өгсөн.