“Үндэсний цэцэрлэгт хүрээлэн” төслийн удирдагч Б.Батнягттай холбогдож паркийн ажил яагаад хойшлоод байгаа талаар тодрууллаа.
-Парк яагаад хугацаандаа ашиглалтад орсонгүй вэ. Юунаас болоод хойшлоод байна?
-Биднээс шалтгаалахгүй зарим нэг асуудал гарлаа. Мөсөн гулгуурын талбайг авчрах хугацаа 20 хоног хэтрээд саяхан ирсэн. Одоо тал хувийг нь угсарч дуусгаад байна. Түүнчлэн тоглоомуудыг турших явцад зарим зүйлийг өөрчлөх шаардлага гарсан. Тухайлбал, алсыг харагчийн бүх бүхээгийг солих гэж байгаа. Одоогийн бүхээг нь жижигдээд, материал нь манай уур амьсгалд тохиромжгүй байгаа тул шинийг захиалсан. Түүнчлэн өнгөрсөн хугацаанд асфальтны үнэ нэмэгдсэнээс төсөвт өөрчлөлт орж, зам талбайн ажил саатсан. Түүнээс гадна Америкаас том оврын дөрвөн тоглоом хараахан ирээгүй гэх мэт шалтгаанууд бий.
-Тоглоомын хэмжээ, материалыг урьдчилан бодож тооцоолоогүй хэрэг үү?
-Энэ бол гардаг л хүндрэл. Яагаад гэвэл бид тооцоолоод, ирсэн хойно нь туршиж үздэг. Турших явцад асуудал гарвал шинэчилж, солиулах тохиолдол байдаг. -Автомашины зогсоолын ажлыг түр зогсоосон гэж дуулсан? -Зогсоолын хэсэгт Нарны зам руу хоёр уулзвар гаргах хэрэгтэй байгаа. Гэтэл чанартай замыг сэтэлж болохгүй гээд Замын цагдаагийн газраас энэ ажлыг зогсоосон. Уг нь зам гаргах зураг төсөл нь батлагдсан. Тиймээс бид ЗЦГ-т албан бичиг хүргүүлээд хариуг нь хүлээж байна.
-Хүүхдүүд хэзээнээс паркт тоглож болох бол. Энэ намар байтугай ирэх жилийн хүүхдийн баяраар ашиглалтад орж чадах юм уу?
-Наймдугаар сарын 15-нд нээх бодолтой байна. Нуурын дундах цамхаг, мөсөн талбайн хажуугийн амралтын байр хүйтэнтэй золгоод цувраад ашиглалтад орох байх даа гэв. Ингээд зуны амралтаараа паркт тоглоно гэсэн хүүхдүүдийн төлөвлөгөө нурав. Ер нь манайхан явцын дунд гарах ямар нэгэн эрсдэл, хүндрэлийг урьдчилан бодож тооцоолдог баймаар юм. Хүүхдүүдийн сэтгэлээр хэчнээн удаан тоглох вэ дээ. Хөөрхий хүүхдүүд долдугаар сарын 8-нд парк явна гэж ямар их хүлээж догдолж байсан бол.