Ардчилсан намынхан "Ардчиллын өргөө" нэртэй шинэ байртай болохоор шийдэж хандив цуглуулж эхэлсэн нь саяхан. Одоогоор энэ ажил ямар төвшинд явж байгааг тус намын ерөнхий нарийн бичгийн дарга Д.Эрдэнэбатаас тодрууллаа. -Намууд том том байртай боллоо гэх шүүмжлэл байгаа. Ардчилсан нам шинэ байраа хэзээ барьж эхлэх вэ? -Ардчилсан намын байрны тухай эерэг, сөрөг олон мэдээлэл явж байгаа. Хамгийн гол нь Ардчилсан нам өөрийн гэсэн байртай байх ёстой гэсэн хатуу шийдэлд бид хүрсэн. 20 жилийн турш бид түрээсийн байранд амьдарлаа. Энэ улс орны төрийн бодлогод оролцож байгаа нөлөө бүхий нам өөрийн байртай байх нь зарчмын асуудал гэж бодож байна. Ямар ч шүүмжлэл байсан энэ байрыг босгох нь бидний үүрэг. -Барилгын ажил эхлэх болоогүй юу? Хөрөнгө мөнгө шийдэгдэхгүй байна уу? -Өнгөрсөн арванхоёрдугаар сарын 6-нд байрныхаа шавыг тавьсан. Өнөөдрийн хувьд ажил нэлээн эрчимтэй явж байна. Ямар хөрөнгөөр босгох вэ гэдэг асуудал бид бүхэнд тулгарч байгаа юм. Мөнгө босгох тухайд менежментийн цоо шинэ аргуудыг хэрэглэж байна. Ардчилал өргөөгөө барихад ард түмний дэмжлэг хэрэгтэй байна. Одоогоор иргэдийн хандивласан эд зүйлс, мөнгөн тусламж нийлээд найман сая төгрөг цуглаад байна. Үүнийг нуух шаардлагагүй биз. Саяхан нэлээд нөлөө бүхий хандивлагчдын уулзалтыг зохион байгууллаа. Овоо гайгүй мөнгө цугласан гэж хэлж болно. Түүнчлэн одоо бидэнд зураг төслийн ажил үлдээд байна. Суурийн зураг, карказын зураг, интерьерийн гэсэн гурван хэлбэрээр хийлгэж байгаа. Энэ жилийн бидний зорилт намынхаа хуучин байрыг буулгаад, сууриа тавих энэ ажлыг эхлүүлэх. -Намын байрыг барьж эхлээгүй ч хэзээ дуусгахаар төлөвлөж байна вэ? -Хугацаанд шахаж хийхгүй. Би дээр хэлсэнчлэн мөнгө босгох тухай асуудлаа эхлээд шийднэ. Бид улсын төсвөөс мөнгө авахгүй. Тэгэхдээ улсынхаа төв цэг дээр байх барилгын давуу талыг ашиглаж, үүнд тулгуурлан хөрөнгө босгох янз бүрийн арга төлөвлөж байгаа. Үүнийг бид ашиглаж чадна гэж бодож байна. Энэ сараас намынхаа байрыг буулгана. Түүнчлэн хэвлэл мэдээллээр ч янз янзын зүйл яригдаж байгаа. Жишээ нь, МАХН, манай байр хоёрыг дүйцүүлж үзэж байгаа. Энэ бол ямар ч дүйцээд байх асуудал биш гэж ойлгож болно. Хамгийн гол нь Ардчилсан нам иргэдийнхээ дэмжлэгээр өөрийн гэсэн орон байртай болох нь зайлшгүй хүлээгдэж байгаа зүйл гэж ойлгож байна. -Гүйцэтгэгчээр ямар компани ажиллах вэ? Ямар нэгэн тендер зарлах уу? -Тендер зарласан юм байхгүй байгаа. Яг одоогоор ажлын зураг хийгдээд явж байна. Эхний ээлжинд суурийн зургийг маш хурдан дуусгах ёстой. Зураг гарсны дараа хаанахын ямар компаниар хийлгэх вэ гэдэг асуудал үүснэ. Маш олон үүрэг гүйцэтгэгч гарч ирнэ. Өнөөдрийн байдлаар гэхэд л зөвхөн энэ байрыг буулгах талаарх компаниудын саналыг аваад байна. Байрыг буулгана гэдэг асар том ажил. Манай байртай хотын төвийн цахилгаан хуваарилах станц өрөө залгаатай байдаг. Үүнийг хааш нь нүүлгэн шилжүүлэх талаар ярилцаж байна. Мөн үүнээс гадна манай байрны хажуу талд хоёр том театр байгаа. Театруудын барилгын суурийг хөндөхгүйгээр ямар техник технологи хэрэглэж, барилгын сууриа ухах вэ гэсэн төвөгтэй асуудлууд байна. Суурийг зөв тавих ажлыг маш нухацтай, яаралгүй хийх ёстой гэж бодож байна. Тийм учраас одоогоор барилгын гүйцэтгэлийн талаар ярихад арай эрт байгаа юм.