Хотын гол замуудыг холбосон хоёрхон гүүрний маань ачааллыг ихээхэн хөнгөлөх “Нарны гүүр”-ийн ажлын явц ч төлөвлөгөөний дагуу сайн гүйцэтгэгдэж байна. Энэ ажлыг гүйцэтгэж буй япончууд сүүлийн үед дэлхий дахинаа өргөнөөр хэрэглэх болсон ухахгүйгээр зоож тогтоодог шинэ технологийг нэвтрүүлж байгаа аж. Энэхүү технологийг авто зам, төмөр зам гэх мэт онцгой объекттой ойр газарт хэрэглэдэг агаад ойр орчмын газрыг нь ухаж сэндийлэхгүйгээр гүүрийн баганыг өрөмдөж тогтоодог байна. Ялангуяа Нарны гүүр нь төмөр зам дээгүүр баригдах учир үүнийг ашигласнаар төмөр замд ямар нэгэн өөрчлөлт орж, нөлөө үзүүлэхгүйгээрээ онцлогтой гэж гүйцэтгэгч компанийнхан танилцуулж байсан. Энхтайвны болон Гурвалжингийн зэрэг гүүрүүдэд төмөр бетон бэлдэц ашигладаг бол Нарны гүүрэнд ган төмөр бетон хийцийг ашиглахаараа онцлог агаад гүүрийг барихад шаардлагатай тоног төхөөрөмж, хийцүүдийг Японоос авчирч байгаа юм. Өнгөрсөн 3 дугаар сарын 29-нөөс ажил нь эхэлсэн тус гүүр нь 2012 оны 11 сард ашиглалтад орно.