Өмнөд Солонгосын загвар зохион бүтээгч дизайнерууд сүүлийн жилүүдэд сонин санаа гаргадаг болоод байгаагаараа гайхагдаж байна. Юуны өмнө, Сөүлийн Хонгик (Hongik University, Hongdae ч нэрлэдэг) их сургуулийн оюутнууд энэ талаараа манлайлж байгаа гэхэд болох аж. Хонгик их сургууль нь 1946 онд үүсгэн байгуулагдсан бөгөөд өнөөгийн байдлаар загвар зохион бүтээлтийн чиглэлээр мэргэжилтэн бэлтгэж буй Өмнөд Солонгостоо хамгийн томд тооцогдох дизайн урлагийн факультет нь ихээхэн нэрд гараад байгаа юм байна.
Тус сургуулийн оюутан Ён Зи Ким (Yoon-Zee Kim) энд зурган дээр үзүүлсэн сонирхолтой тавиур /сандал, ширээ ч гэх юмуу/-ын загварыг гаргажээ. Хийсэн материалын тухайд онцлох зүйл төдийлөн үгүй. Хуванцар юмуу олон давхар үе бүхий фанераар хийж болно. Хамгийн гол нь түүнийг хананд найдвартай бэхлээд хүний жинг дааж чадахуйц болгоход учир байгаа ажээ. Зай талбай багатай өрөө, офист тохируулан хийж болох энэхүү сандалыг ширээ болгон ашиглахад юм тавих зай нь бага учраас энэ тал дээр учир дутагдалтай байгаа юм.