Гал тогооны өрөөний интерьер дизайн



    Гэрийн эзэгтэй таньд зориулан гал тогооны өрөөний интерьер дизайны талаар танилцуулах гэж байна. Та бүхэнд гарын доорх материалаар өөртөө болон гэрийнхэндээ хэрхэн тохь тухтай, таатай орчинг бүрдүүлж болох талаар товчхон зөвлөгөөг хүргэж байна.
    Сүүлийн үеийн гал тогооны тавилгууд ихэнхдээ хуулга байх болсон хэдий ч жирийн нарсан банзан, модон тавилга хэрэглээнээс гараагүй хэвээр. Учир нь хуулгыг бодоход модон эдлэл нь эдэлгээ сайн даахаас гадна дээд зэрэглэлийн гал тогооноос ч дутахааргүй үзэмжтэй, тохь тухтай байна гэдэгт итгээрэй.

 

Ямар ч гал тогооны тэр тусмаа жижигхэн талбайтай өрөөг ч хэрэв та өөрөө хүсэх юм бол шал өөр болгож болдог. Мэдээж гал тогооны өрөөнд ширээ, аяга тавагны тавиур, шүүгээ зайлшгүй хэрэгтэй. Иймд зай бага эзэлсэн гал тогооны тавилгыг сонгохдоо буланд багтаж болохоор хэмжээтэй, олон жижиг шүүгээтэй, нүсэр биш сандлуудтай ширгээг сонговол тун тохиромжтой. Гэхдээ ширээгээ сонгохдоо хэт жижиг ширээг сонгох тийм ч зөв арга биш юм. Гал тогооны өрөөнд гэр бүлээрээ тойрон сууж хооллодог, халуун дулаан уур амьсгалыг бүрдүүлж байдаг өрөөнүүдийн нэг учираас гэр бүлээрээ тойрон сууж болохуйц ширээг сонгох хэрэгтэй.
Гал тогооны өрөөнд ч бас өнгөний зохицол чухал хэрэгтэй гэдгийг бүү мартаарай. Гал тогооны өрөөнд хар, бараан өнгөтэй тавилга байх нь тохиромжгүй. Аль болох идэх дур хүслийг төрүүлэхүйц дулаан, тод өнгө байх нь хүний идэх дур хүслийг төрүүлэхээс гадна өрөөг дулаахан, тохилог харагдуулахад нөлөө үзүүлдэг.


Мөн гал тогооны өрөөнд зориулсан Фэн Шуйгийн тохижуулалтын талаарх мэдээлэлийг хүргэе.
Гал тогооны өрөө гэдэг айл гэрийн амин сүнс гал голомт нь болж явдаг. Мөн гал тогоонд хүний эрүүл саруул ухаанаар сэтгэх оюуны болон биеийн хүчийг тэтгэж байдаг хоол хүнс, тэжээл боловсруулагдаж хадгалагдаж байдаг болохоор энэ л хэсэг хамгийн цэвэр хамгийн сэргэг энергийн урсгалаар хангагдаж байх ёстой.


•    Гал зуухаа гэрийнхээ гүн рүү байрлуул
Танай гал зуух боломжийн хэрээр гэрийн тань гүн рүү байх ёстой. Гол хаалгатай ойролцоо хэзээ ч бүү байрлуулаарай. Энэ нь танайд орж ирж байгаа эерэг нөлөөтэй сайн энерги шууд гал зууханд орж хайрагдах шарагдах нөхцөлийг бүрдүүлдэг. Тиймээс аль болох гэрийнхээ хойд тал руу байрлуулах хэрэгтэй. Гэхдээ энэ нь бас хамгийн хойд тал гэсэн үг биш юм. Учир нь ертөнцийн зүгээр чанх хойд зүг нь усан амьсгалтай буюу усан махбодьтой тул танай гал голомтыг дарах, эхнэр нөхөр 2 байнга хэрүүл маргаантай байх, өвчин зовлонд ороогдох зэрэг сөрөг үр дагавартай.

•    Гал зуухаа хэзээ ч баруун хойд буланд бүү байрлуул
Айл гэрийн гол хүн буюу хоол залгуулдаг хүний ажил төрөл бүтэлгүйтэх, эд баялаг, мөнгө төгрөгөөр хомсдох, цаашлаад эрүүл мэнд нь муудах зэрэг нь үүнээс шалтгаалдаг. Таны гал зуух баруун хойд буланд байрлаж байх нь төмрийн буланд байгаа их галыг илэрхийлдэг бөгөөд баруун хойд зүгийн төмөр махбодь нь гэрийн эзний буюу аавын буланд тооцогддог. Тиймээс гэрийн эзний хийморь сүлд, ноён нурууг шатааж байдаг. Мөн энэ зүг нь айл гэрийн бурхантай харилцах хаалга болж өгдөг учраас тухайн айлын өөдлөн дэвжих замыг хаах аюултай.
Хэрвээ нэгэнт энэ буланд гал тогоо чинь байрласан бол ядаж галыг илэрхийлдэг тавилга хэрэгсэл болох зуух, шарах шүүгээ, будаа агшаагч зэргийг тэндээс холдуулж байрлуулаарай.
Хэрвээ та дээрх аргын дагуу холдуулах боломжгүй бол баруун хойд хэсэгт нь дунд зэргийн бумба юм уу домбонд эсвэл вааранд нуурын тогтоол болон нэг хонуулсан крантны зөөлөн ус хийж тавь. Энэ нь муу нөлөө бүхий уг галын хүчийг бууруулах болно.

•    Гал тогооны өрөөндөө үргэлж цэвэр агаар оруулж бай
Гал тогооны өрөөндөө үргэлж цэвэр агаар оруулж аливаа хиншүү хярвас, тогтсон муу энергийг зайлуулж байх нь зүйтэй. Өдөр бүр салхивчаа онгойлгож хоол их хийдэг байнгын ажиллагаатай байдаг бол цахилгаан сэнс тавих хэрэгтэй. Бохир, тоос шороо, тос хиншүү ихтэй гал тогоонд хэзээ ч бүү хоол хүнсээ бэлдэж бай.

•    Жорлонгоос хол байлга
Хэрвээ танай гэрийн гал тогооны өрөө жорлонтойгоо ойр байвал мөн л адил муу нөлөө үзүүлдэг. Ялангуяа зуух буюу плетик рүү чинь жорлонгийн хаалга харахгүй байх ёстой. Ийм тохиолдолд жорлонгийн хаалгыг байнга хаалттай байлгаж плетикээ холдуулж тавихыг хичээгээрэй.

•    Хогийн саваа нүднээс далд байлга
Хогийн сав нь айл гэрийн муу муухай хаягдал бүрийг цуглуулж байдаг учраас тэрхүү муу энерги танай хоол хүнс эрүүл байх нөхцөлд байнга сөрөг үр дагавар авчирч байдаг. Тиймээс хогийн савыг гал тогооноос гаргах юм уу аль эсвэл угаалтуурын доор шүүгээ хийж түүндээ тавих хэрэгтэй. Хогийн шүүр ч мөн адил нөлөөтэй юм.

•    Махбодиуд зөрчилдөхөөс болгоомжил
Гал тогоо гэдэг гал ус гэсэн хоёр томь махбодийг өөртөө багтааж байдаг. Энэ хоёрыг зөв зохицуулж чадвал айл гэрийн өөдлөн дэвжихэд сайнаар нөлөөлдөг. Харин буруугаар буюу хөргөгч, угаалтуур зэргийг гал болох зуух плетик рүү харуулсан байх нь маш хортой. Гэр бүлийн гишүүдийн хоорондын маргаан, эмх замбараагүй байдлыг үүсгэдэг. Мөн зуух болон усны зүйлийг зэргэлдээ байрлуулж болохгүй.

•    Галынхаа амыг харуулах зүг бас учиртай
Гэр бүлийн гишүүдийн мөнгө санхүү нь гал тогоонд гал буюу плетикний ам хаашаа харснаас шалтгаалдаг. Таны төрсөн жилийн куа дугаар нь тодорхой нэг зүгийн бүлэгт хамаарагдах ба энэ нь та хэрвээ зүүн бүлгийн хүн бол зуух тань мөн л зүүн зүг рүү харж байрласан бол сайнд тооцогдоно.
Гэр бүлийн гишүүд бүгд өөр өөр зүгийн буюу бүлгийн хүмүүс учраас ийнхүү зөрөх тохиолдолд зөвхөн гэрийн эзэн ба нөхрийнхөө ээлтэй зүг рүү амыг нь харуулж тавьсан байвал зохино. Гэрийн эзэгтэйд нөхрийнх нь ээлтэй зүг тохирдоггүй, түүнээсээ болоод хоол хийж байхдаа муу нөлөөнд автдаг бол та өөртөө ээлтэй байрлалтай зуух дахиж нэмж байрлуулаад өөрийнхөө ашигладаггүй зуухыг нөхрийнхөө ээлтэй зүг рүү байрлуулж түүнийгээ гэрийнхээ гал голомт гэж үзэж болно.

•    Гал тогоо буюу зуухаа ашиглан бусад зүйлийг хөгжүүлж болно
Хэрвээ та өөрийн куа дугаарыг ашиглаж эд баялаг, эрдэм мэдлэг, хайр дурлал, хувийн хөгжил гэсэн 4 сайн зүгээ мэдэж байгаа бол зуухныхаа амыг тэдгээр зүгийн аль дутагдаж байгаа руу нь харуулж хөгжүүлж болох юм. Плетик буюу зуухаа тэр бүр хөдөлгөөд байж болохгүй учраас түүний оронд будаа агшаагч, шарах шүүгээ зэргээр төлөөлүүлж болно шүү дээ.

•    Нэг удаагийн хутга болон халбага сэрээ, аяга сав хэрэглэхээс татгалз
Хэдийгээр хөдөө хээр аялал зугаалгаар явах, яаралтай цаг давчуу байхад хаяа хэрэглэхэд нэг удаагийн хэрэгслүүд амар боловч гэрийнхээ гал тогоонд ийм зүйлсийг байнга хэрэглэх нь таныг зориулалтын чанартай шилэн болон бусад төрлийн хэрэгсэл авах нөхцөлийг дарж байдаг бөгөөд байнга хэрэглэх нь хортой.

    Бас нэг гал тогоонд зайлшгүй хэрэгтэй зүйл бол уур шүүгч юм. Энэ нь хоолны эвгүй үнэр, хиншүү хярвас тархахаас хамгаалдаг учир эзэгтэй таны гал тогооны өрөөнд зайлшгүй байх хэрэгтэй.
    Хэрэв танай гал тогооны өрөө том хэмжээтэй бол ширээ сандалаас гадна буйдан байрлуулсан ч болно. Ингэснээр хооллосныхоо дараа цайгаа уунгаа тав тухтай ярилцан суухад тохиромжтой, ая тухтай орчинг бүрдүүлж байгаа юм.
    Мөн таны сонирхдог зураг, эртний эдлэл, аяга тавагны цуглуулга ч гэсэн хэрэв байрлал, өнгө зохицолыг нь олж байрлуулвал хамгийн сайхан чимэглэл болж чадна.
    Эдгээр санаануудыг өөрийн уран сэтгэмжтэйгээ холбож сонгож янзлавал эзэгтэй таны гал тогооны өрөө таны хамгийн хайртай өрөөнүүдийн нэг болж чадна гэдэгт итгээрэй.

БАРИЛГА.мн
Эх сурвалж:

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.